يحي محمد سالم

اياك مايكثر لعياط والزياط ، ويكثر التخلاط ..

وعاكب ذا الفات كامل من الزمن بالفات بيه من اقصارت الوقت والتلفات ومراد شرتات ، مايقد حد يكون يعصر مخو في ايخمم باهل الصحراء واعلى اهل الصحراء ، وظنتي عنو ماهو محتاج يشرح اعلاه ، بيهة هاذي هي مسؤلية أي صحراوي اسوى امنين عاد ، من هون الى كي هيدي .

ولازم يعرف أي حد خمم اسوى هو من هو عن ذا الجاب اراهو الا راي ، اوذاك معناه عنو ماهو (تنزيل من رب العالمين) ، ومعناه عن ماوصي حد اعلى تخمام حد واشكال افشي يعني مصير الرجلي كامل .

بيها القضية متكادين فيها كاملين ومن هون اتوافقوا اعلى انجاوبوا "كلنا ابطريقتوا" عن سؤال اشفات واشجاي ؟

الفات فات ، ولاتلا اعليه اتلفات اسوى اصا منو ذاك من شي زين عدلتو الناس مقتنعا بيه وعارفا قيمتو ، واسوى منو ذاك الشين اياك مانتورخولوا من عند 88 اعلى ايلاه

اساقة وكثرة لخبار واتعيريم ماهو هام حد ، والحق والسعي فيه والتلواد لو هو الجاب اهل الصحراء الذي اتراب الي ما كان حد حاجلو عنها خالقا واشكال يسكنها ، وطنتي عن اول مسلة يعدلها حد هامو ايداوي يعرف المرض وايزوز اعليه ، بيه باطل اتخزان واتليوليب مايجيب شيء ، وكيف نعرفو كاملين المستر باليام عريان .

معناها ان حد يعترف بعد قاع بالخالق اسوى شنهو ، وحنا اشتت شملنا واشيان تخمامنا واتبدلت اقرايتنا للمسائل ، وإياك ماندخلو "شنكة بنكة" اعلاه وحنا كنا وعدنا ! لازم نعرفوا احنا امنين قايسين واشعندنا امبين ليدين ؟

او بالحسنية واسوى النتيجة شنهي ، خاص كل حد يعرف اسوى الفوق واسوى التحت عنو حتى ولو عدنا مانقدو نخموا بشكل جماعي راهو مامعنى ذاك عنا فوضنا واحد هو اللي يخمم النا ، ولا معناه عن فكرة الواحد ايعممها انين اتعود فكرتنا كاملين ، بيه باطل زمن الوصاية اتخطيناه ، وذا نعرفو وذا مانعرفوا ماتلات رايا افمن تصدق ، والحق عن ذاك القالوا اجدادنا هو الحق ، وامنين قالوا عن : حمل اجماعة ريش خاص الرجلي كامل يفهم عنو حمل اجماعة ولاهو حمل اركاج هو اللي ريش .